1Cor 10 | AOJFILIFITA | STEP | Alupipei, aeꞋ andaiwaꞋma ipeꞋ ukup moseꞋepama amamaga amama. Esis bafasapa hiesi Israel sape owina elagw amama maliꞋas safeꞋ eaꞋ hiesi safeꞋ boꞋwagah asasimi sowala sambo naoh embel akwahimi

1 Corinthians 10

1 Alupipei, aeꞋ andaiwaꞋma ipeꞋ ukup moseꞋepama amamaga amama. Esis bafasapa hiesi Israel sape owina elagw amama maliꞋas safeꞋ eaꞋ hiesi safeꞋ boꞋwagah asasimi sowala sambo naoh embel akwahimi 2 sawisa elagw maloma naoh embel safeꞋ. Amama mondolaꞋwifa sofaꞋ baptais sape saloma Moses salomana naoꞋwas safeꞋ. 3 EaꞋ esis hiesi saꞋ gwaꞋaimi amama God naseꞋasami, 4 saꞋ embel amama God naseꞋasami. Esis saꞋ embela owap anama God naseꞋasami nafeꞋ nalomas. Owap anama nondolaꞋwifa Krais atona. 5 EaꞋ God nandaiwaꞋma hiesi sape saloma esis. Amama atom deiꞋ sagaꞋ hiꞋalas etap anama wafiguma.

6 EaꞋ amamaga amama hiami mataga mihiꞋambapa siꞋi anona ikwafa apeꞋ motolom mogawa ma apeꞋ ina ukup mimila amamaga awami siꞋi esis fowaꞋ sandaꞋam, owaꞋ. 7 IpeꞋ ina ukup mimila god basoꞋomunai siꞋi esis fowaꞋ sandaꞋam, owaꞋ. Baibel naꞋi esis naꞋama naꞋi, “Amam nematawa sape sandaꞋ gwaꞋaimi embel saꞋam sohafel salemb etin sandaꞋ salamal ki deꞋiaf sape.”

8 ApeꞋ wapotiꞋ ina mondaꞋ waf anama aonai soꞋa waolanai siꞋi esis fowaꞋ sandaꞋam, ama nemaf atotona esis 23,000-peleis sagaꞋ hiꞋalas. 9 EaꞋ apeꞋ ina mogwamba God siꞋi esis fowaꞋ sagwambana ma iguf awami mahasa sagaꞋ hiꞋalas, owaꞋ. 10 IpeꞋ ina ukup aom miꞋi diga wandafunai peloma God siꞋi esis fowaꞋ sandaꞋmanam God, ma ensel anama naha epes sagaꞋi nafiꞋi nahas sagaꞋ hiꞋalas, owaꞋ.

11 Amamaga amama hiami matagama esis, amama siꞋi anona ikwafa apeꞋ deiꞋ mape nogota anaeꞋ felefeleꞋma naꞋi hiꞋilana. Amama siꞋi anona ikwafa apeꞋ motolona mundumafuma andeandeꞋ. NaꞋama mondaꞋ waf aonai siꞋi esis. 12 EaꞋ emi egafis siꞋi esis etis situ laꞋifis, esis sundumafuma andeandeꞋ. NaꞋama sowa ma waf aonai. 13 Amamaga meagwamba ipeꞋi, amama ina anom deiam, owaꞋ. Amama naꞋama etin siꞋi gwamba matagama epes hiesi. God naila basef ananimi endilisimi nandaꞋ amamaga ananimi andeandeꞋ. Anan ina nambimb niꞋi ahoꞋma amama meagwamba ipeꞋi motagama ipeꞋ mikilaꞋ pepel ipeꞋinai, owaꞋ. Nemaf anama amama motagamepa, God nondaꞋ anona eafa nigiambamepa pitu laꞋifipa.

ApeꞋ ineꞋ mila god basoꞋomunai noloma ambagof awami moloma God wapotiꞋ, owaꞋ. Hapaimi

14 IpeꞋ alupipei endilisi aeꞋipei, ipeꞋ pekwaha waf anama pailana god anama basoꞋomunai, pewaꞋ alafugaha anan. 15 IpeꞋ pegawa, deiꞋ aꞋipipa. IpeꞋ etipa pewaloga basef amama aeꞋami. 16 Kap anama aman numafi lotuwi nofaloꞋmana, anama naꞋama. ApeꞋ manifela Goda kap anama nakolasa apeꞋ maloma esimbel Kraisi. Endilisi etis bret anama apeꞋ mawalonai, anama nakolasepa maloma alop Kraisi. 17 Bret atotona. Amama mihiꞋambapa amam nematawa hiapai mape siꞋi alop atotona. DeiꞋ main, apeꞋ hiapai mandakolas mandaoꞋoma maꞋ bret atotona.

18 IpeꞋ ukup ataꞋ mopoma esis Israel. Epes isima saꞋ gwaꞋaimi mafis sondolali ma God balata anama sandatama sape etifigin saloma Goda balata anama. 19 Basef ofagema doꞋok aꞋipipami maꞋi main? GwaꞋaimi mafis maim sondolalima god basoꞋomunai endilisimi? Amam god anama basoꞋomunai endilisimi? AeꞋ aꞋiam naꞋama? OwaꞋetin. 20 AeꞋ aꞋiam aꞋi amamaga esis sololama Godi sondolalima god basoꞋomunai, ina sondolali ma God, owaꞋ. AeꞋ andaiwaꞋma ipeꞋ pendakolas peloma god anama basoꞋomunai, owaꞋ. 21 IpeꞋ ina peaꞋ embela kap Dembinai noloma kap god basoꞋomunai wapotiꞋ, owaꞋ. EaꞋ ina peaꞋ gwaꞋaimi balata Dembinai moloma gwaꞋaimi balata sondolali ma god basoꞋomunai wapotiꞋ, owaꞋ. 22 ApeꞋ ina mondaꞋ maol molomas ma god basoꞋomunai mondaꞋ okom Dembinai aona ma apeꞋ, owaꞋ. ApeꞋ ina miꞋi apeꞋ laꞋifipai mikilaꞋ Dembinai, owaꞋ.

23 IpeꞋ paꞋi, “AndeandeꞋma mondaꞋ amamaga mamumami hiami.”

Amama endilisi, eaꞋ ina amama hiami magiambamapa, owaꞋ. IpeꞋ paꞋi, “AndeandeꞋma mondaꞋ amamaga mamumami hiami.”

EaꞋ ina amamaga hiami mandaꞋapa mataga laꞋifipa ma baleꞋef, owaꞋ. 24 IpeꞋ ina ukup mopoma ipeꞋ etipa pindumafuma pepe andeandeꞋ, owaꞋ. IpeꞋ ukup mopoma enis epes wapotiꞋ ma pigiambamas sope andeandeꞋ.

25 Mafis ^{▼▼Pol nandaiwaꞋma esis Kristen sape Korini sondaꞋ hahaliꞋma mafis amama sondolali ma god basoꞋomunai. NaꞋi hapaimi, esis sogwaꞋam.} hiami satalom stowa, amama ipeꞋ pendaꞋam. Ina ukup mope hiahiam pindahahaliꞋmam, owaꞋ.

26 DeiꞋ main, “Etap anaeꞋ naloma amamaga hiami, amama Dembinai atom.”

27 IꞋi enin epen owaꞋ neambaleꞋefa Kraisi nefalepa niꞋi pefeꞋ pelomana peaꞋ gwaꞋaimi ma piꞋi peafeꞋ, andeandeꞋ. PefeꞋ peaꞋ gwaꞋaimi amama enin nandandombama neasiꞋipami. IpeꞋ ina ukup motamea hiahiam pendahahaliꞋmam, owaꞋ. 28 EaꞋ iꞋi enin epen niliꞋ niꞋipipa niꞋi, “Mafis amama sondolalima god basoꞋomunai”, ipeꞋ pegawa basef ananimi ina peaꞋam, owaꞋ hapaimi. IpeꞋ piꞋi uwahipin epen inima. 29 AeꞋ ina aꞋi ipeꞋ pemeꞋ basef mape opalef ipeꞋimi nomon maꞋiami pilam, owaꞋ. AꞋi pila basef mape opaf ananinai nomon maꞋiami epen inima naꞋipipei. NaꞋama enin epen niꞋi, “AeꞋ ape wafifiwei. DeiꞋ maina okom enin epen ina laꞋifina nohopa aeꞋ? 30 IꞋi aeꞋ inifela Goda eaꞋam, deiꞋ maina enin epen nehopa aeꞋ ma eaꞋ mafis amama anifela Godami? NaꞋama aeꞋ andaiwaꞋ.”

31 DeiꞋ aeꞋ egwa basefa epen inima. IꞋi ipeꞋ piꞋi peaꞋ gwaꞋaimi embel maim o pendaꞋ maim amamaga, pendaꞋama pefela agel Godi atona luꞋuna. 32 IpeꞋ ukup mopoma epes hiesi, esis Juda soloma esis owaꞋ Judaisi, soloma amam nematawa isima Godi. EaꞋ ipeꞋ ina pendaꞋ anona waf nondaꞋ esis sowa ma waf aonai, owaꞋ. 33 SiꞋi aeꞋ wapotiꞋ andaꞋ maol luꞋunai ma igiambama epes hiesi ma ukup miꞋi waf buꞋunai hianai aeꞋ andaꞋanai. AeꞋ ina andaꞋam agiambama aeꞋ imafi aeꞋ atowe, owaꞋ. AndaꞋama agiambama amam nematawa hiesi ma God nofaꞋas sotanimani.